Рокъоб букIун бугеб лъикI
Ассаламу гIалайкум, хIурматиял бакълъулал, хIурматиял газета ва сайтал цIалулел! Инсанияталъул сабруялъул, хасияталъул, къохIехьеялъул хIалбихьулеб заман тIаде щун буго.
ЦIияб бахунеб унти тIибитIун буго дунялалъул гIемерисел пачалихъазда. Гьелда данде вакцинаги жеги гьабун бахъун гьечIо. Киналго тохтурзабаз, вирусологаз ва эпидемиологаз абулеб буго, коронавирусалъул инфекция тIибитIизе биччалареб тIоцебесеб ва аслияб иш, данде ракIаричIого, рокъо-рокъор рукIин бугилан.
ГIакъил ва гIалим Инхоса ГIали-хIажияс хъвана:
Балагьалъул къояз къирарал цаби
Къалмаллъун рахъуна нахъе ругезе, – абун.
Гьединго киназдаго лъала ГIали-хIажиясул кицилъун лъугьараб калам:
ЗахIмат бихьичIого, рахIат бокьарас,
БекьичIого, лъилъе, нилъ гьечIого, хур.
ГIемерал къварилъаби, гIакъуба ва захIмалъаби рихьараб ва гьел согIал къоял бихьинчилъиялда хIехьараб халкъ буго нилъер. Жакъа нилъеда тохтурзабаз гьарулеб буго нилъерго ва цогидазул сахлъиялъул тIалаб гьабеян, хъизан-лъималгун рокъорго чIаян, инфекция тIибитIизабугеян. Дунялалда гIемер тирарав ЦIадаса Расулица хъвана: «Рокъоб букIун бугеб лъикI!» – абун. Гьал къоял руго рокъор чIей бищунго лъикIаб заман, гьелъухъ кириги камиларо, халкъалъе пайдаги буго. Аллагьас нилъ киналго квешлъабаздаса цIунаги, халкъул гIаламалдаса унта-щокълъиги Халикъас тIаса босаги. Амин.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
